Президентимиз Шавкат Мирзиёевтиң тапсырмасына муўапық, коронавирусқа қарсы гүресте үлкен тәжирийбе топлаған 8 шыпакер гезектеги гуманитарлық жәрдеми менен бирге 8-май күни Тәжикстан пайтахты Душанбе қаласына жөнеп кетти.

Медицина топары қурамында анестезиолог-реаниматолог, пульмонолог, эпидемиолог, инфекционист, вирусолог қәнигелер бар. Олар «COVID-19» инфекциясының алдын алыў, қадағалаў ҳәм емлеўди шөлкемлестириўде тәжикстанлы кәсиплеслерине жақыннан жәрдем берди.

Бийғәрез жәрдем жүги қурамында болса 10 өкпени жасалма вентиляциялаў үскенеси, түрли дәри-дәрмақлар, медициналық қорғаныў кийимлери, қолғаплар, респираторлар бар.

Өзбекстан Республикасы Президенти Шавкат Мирзиёев 5-май күни Тәжикстан Республикасы Президенти Эмомали Раҳмон менен телефон арқалы сөйлесип, регион ҳәм дүньядағы болып атырған эпидемиологиялық жағдайды додалаған еди. Еки мәмлекет басшылары бир-бирин коронавирус инфекциясы тарқалыўы мүнәсибети менен мәмлекетлеримизде жүзеге келген жағдайдан хабардар етип, кризисти биргеликте сапластырыў бойынша бирге ислесиўге таяр екенлигин билдирген еди.

Өзбекстаннан жиберилген гезектеги гуманитарлық жәрдем ҳәм тәжирийбели шыпакерлерден ибарат топар Тәжикстанда  коронавирусқа қарсы гүресиў жумысларын нәтийжели шөлкемлестириўде мәмлекетлеримиздиң бирге ислесиўиниң әмелий көриниси болады.

ӨзА