Өзбекстан Республикасы Президенти Шавкат Мирзиёев 9-март күни Түркия Республикасы сыртқы ислер министри Мавлуд Чавушўғли басшылығындағы делегацияны қабыллады.
Ушырасыўда Өзбекстан – Түркия көп қырлы қатнасықларын раўажландырыўдың әҳмийетли мәселелери көрип шығылды.
Мәмлекетимиз басшысы жоқары дәрежедеги турақлы сөйлесиўлер мәмлекетлеримиз арасындағы дослық қатнасықларын ҳәм стратегиялық шерикликти буннан былай да беккемлеў, өз-ара пайдалы бирге ислесиўди кеңейтиў ҳәм оны анық мазмун менен байытыўға хызмет етип атырғанын қанаатланыўшылық пенен атап өтти.
Сыртқы ислер министри Мавлуд Чавушўғли қызғын қабыллағаны ушын Өзбекстан Президентине миннетдаршылық билдирди және Түркия Президенти Режеп Таййип Эрдоғанның сәлеми ҳәм жақсы тилеклерин жеткерди.
Сәўбетлесиў ўақтында өткен жылдың февраль айында Анкара қаласында болып өткен Стратегиялық бирге ислесиў кеңесиниң мәмлекет басшылары дәрежесиндеги биринши мәжилисинде ерисилген келисимлерди әмелге асырыў және гезектеги саммитти мәмлекетимизде өткериўге таярлық көриў мәселелерине айрықша итибар қаратылды.
Саўда-экономикалық тараўда бирге ислесиўди кеңейтиў, соның ишинде, Түркияның жетекши компанияларының қатнасыўында мәмлекетимизде жаңа инвестициялық жойбарларды таярлаў ҳәм әмелге асырыў әҳмийетли екенлиги атап өтилди.
Жедел аймақлараралық қатнасықты раўажландырыў, биргеликтеги билимлендириў ҳәм мәдений-гуманитарлық бағдарламаларды алға қойыўдан еки мәмлекет те мәпдар екенлиги атап өтилди.
Халықаралық сиясат ҳәм регионаллық шериклик, соның ишинде, Экономикалық бирге ислесиў шөлкеми ҳәм Түркий тиллес мәмлекетлердиң бирге ислесиў кеңеси шеңбериндеги бирге ислесиў мәселелери бойынша пикир алысылды.
ӨзА