Түркия Республикасы тәрепинен жиберилген гуманитарлық жүк «Uzbekistan Airways» авиакомпаниясына қараслы ҳаўа кемесинде Ташкентке алып келинди.
«Стамбул-Ташкент» жөнелисинде пәрўаз еткен самолёт арқалы жеткерилген гуманитарлық жәрдемди Ислам Кәримов атындағы Ташкент халықаралық аэропортында Өзбекстан Республикасы Денсаўлықты сақлаў министрлигиниң жуўаплы хызметкерлери Түркияның мәмлекетимиздеги елшиханасы ўәкиллери менен бирге күтип алды.
Өзбекстан Президенти Шавкат Мирзиёев ҳәм Түркия Президенти Режеп Таййип Эрдоған быйылғы жылы 22-апрель күни болып өткен телефон арқалы сөйлесиў ўақтында жаңа глобал қәўип – коронавирус инфекциясының тез тарқалыўына қарсы гүресте және де бирге болыўды қоллап-қуўатлаған еди.
Мәмлекетлеримиз басшыларының беккем ерк-ықрары себепли өз-ара қатнасықларымыз жоқары шоққыға көтерилген бир ўақытта әне усы бирге ислесиў үлкен әҳмийетке ийе. Биргелигимиз пүткил дүньяны қәўетерге салған коронавирус пандемиясы дәўиринде еки мәмлекет жетекшилери арасындағы сөйлесиўде ерисилген келисимлердиң және бир әмелий нәтийжеси сыпатында белгили болды.
Түркияның өзинде ислеп шығарылған, өкпеге жасалма дем жибериў ушын мөлшерленген 50 дана аппарат республикамыз бойлап биринши гезекте жәрдемге мүтәж, ең зәрүр орынларға тарқатылады. Бул үскене халықаралық стандартлар тийкарында сынақтан өткерилген болып, коронавирус кеселлигиниң аўыр түрин басынан өткерип атырған наўқасларды саламат турмысқа қайтарыўға жәрдем береди.
– Пүткил жер жүзинде аўыр жағдай жүзеге келгенде еки туўысқан мәмлекеттиң бир-бирине жәрдем бериўи, бир-бирин қоллап-қуўатлаўы тәбийғый жағдай, – деди Түркия Республикасының мәмлекетимиздеги елшиханасы ўәкили Айбуке Аҳсен Туран ханым. – Бул сынақлы күнлерде бир-бирине жәрдем бериў халықларымыздың тәбиятына тән пазыйлет. Түркияның медициналық үскене көринисиндеги усы жәрдеми де пикиримизге айқын мысал бола алады.
Қәнигелердиң пикирине бола, Түркияның өкпеге жасалма дем жибериў аппаратлары басқа альтернатив үскенелерге салыстырғанда жоқары сапаға ийе ҳәм барлық жас түриндеги наўқаслар ушын мөлшерленген.
Буннан алдын эпидемия менен нәтийжели гүрес алып барыўды қоллап-қуўатлаў мақсетинде Түркия Өзбекстанға жеке қорғаныў қураллары – 50 мың медициналық нықап ҳәм 200 мың комбинезоннан ибарат гуманитарлық жәрдем жиберген еди.
Ғайрат ХОННАЗАРОВ,
ӨзАның хабаршысы