Өзбекстан Республикасында быйылғы жылдың «Қазақстан жылы» деп жәрияланыўы мүнәсибети менен 20-25-август күнлери аралығында «Тоғыз қумалақ Нөкис-2019» халықаралық турнири болып өтпекте. Турнирде спортшылар «Тоғыз қумалақ» ҳәм мангала ойынлары бойынша беллеспекте.
Өзбекстан Республикасында биринши мәрте өткерилип атырған «Тоғыз қумалақ» бойынша турнирде Қазақстан ҳәм Қарақалпақстан Республикаларынан, Ташкент қаласынан 14 жастағы ҳәм 15-19 жаслар аралығындағы ул және қыз балалардан, ер ҳәм ҳаял адамлардан ибарат 6 топар беллесиўге түскен. Жарыс айланба ҳәм швейцар усыллары бойынша 5-7 турдан ибарат. Егер жарыста 6-8 ойыншы болса, олар айланба усылы менен, оннан көп болса швейцар усылында жарысады.
Ал, мангала ойыны бойынша еки топар беллесиўге түсти. Бир топарда 26 ер адам, екинши топарда 17 ҳаял-қыз ойнап атыр.
– Бүгинги турнир Қарақалпақстан Республикасы Денетәрбия ҳәм спорт министрлиги тәрепинен Дүнья жүзилик «Тоғыз қумалақ» федерациясы менен биргеликте өткерилмекте, – дейди Дүнья жүзилик «Тоғыз қумалақ» федерациясының кеңесгөйи, Қазақстан Республикасына мийнети сиңген тренер-оқытыўшы Махсат Шотаев. – Бул ойын бойынша бүгинги күнде дүньяның көп еллеринде үгит-нәсият жумыслары әмелге асырылмақта. Интернетте бул ойынның мобиль версиясы да шығарылған болып, «game center com» деген сайтта жүз елдиң спортшылары бир-бири менен беллеседи. Бүгинги күнге шекем «Тоғыз қумалақ» бойынша 5 мәрте олимпиада чемпионаты, 4 рет Европа ҳәм 4 рет Азия чемпионатлары өткерилди. Ҳәр жылы дәстүрий түрде 20 дан аслам еллерде халықаралық жарыслар менен семинарлар болып өтеди.
Қарақалпақстан хабар агентлиги.