Бердақ атындағы Қарақалпақ мәмлекетлик университетинде академик Беҳзод Йўлдошев естелигине бағышланған «Академик ҳәм жаслар: илимниң раўажланыўын жаслар жаратады!» темасында академиклер ҳәм жаслар конгресси болып өтти.

Онда Өзбекстан Республикасы Илимлер академиясының академиклери, Қарақалпақстан Республикасы ҳәм Хорезм ўәлаяты жоқары билимлендириў мәкемелериниң басшылары, докторантлар, илимий излениўшилер, жас илимпазлар, магистрантлар ҳәм қәбилетли студентлер қатнасты.

Илаждың тийкарғы мақсети – жасларды илим ҳәм инновацияға тартыў, оларда илимий қызығыўшылықты арттырыў ҳәм мәмлекет келешеги ушын зәрүр болған жетик илимпазларды жетистириўден ибарат.

Конгресс даўамында академиклер өз илимий жумысының әҳмийетли басқышлары, ушырасқан қыйыншылықлары ҳәм оларды жеңип өтиўде қолға киргизген тәжирийбелерин жаслар менен бөлисти. Сондай-ақ, илим тараўындағы әҳмийетли машқалалар, илимий изертлеўлерде жаңа технологиялардың әҳмийети, дүнья көлеминдеги илимий жетискенликлер ҳаққында да сөз болды.

Бул илаж жаслар ушын илим әлемине жол көрсетиў, оларды илимий изленислерге илҳамландырыў ҳәм өзлери таңлаған жолда исенимли қәдем таслаўына жәрдем бериўге қаратылған. Конгрессте қатнасып атырған жаслар ушын бул академиклер менен тиккелей сөйлесиў, өзлериниң келешектеги илимий жумысы ушын зәрүр мәсләҳәт ҳәм усыныслар алыў имканиятын жаратты.

Д.Абибуллеав, М.Ҳабибуллаев (сүўрет),

Қарақалпақстан хабар агентлиги