Республикамыздың барлық аймақларында болғанындай Төрткүл районында да жаңа жыл байрамына арналған салтанатлы кеше болып өтти.
Районлық мәденият сарайында болып өткен байрам кешесине депутатлар, райондағы сектор басшылары, нураныйлар, жаслар ҳәм балалар қатнасты.
Кешеде район ҳәкими Р.Шамуратов ҳәм басқалар илаж қатнасыўшыларын елимизге қәдем таслап кирип киятырған жаңа жыл байрамы менен қутлықлап, балаларымыздың ертеңги күни елимизге белгили билимли-илимли азаматлар болып жетилисиўине тилеклеслик билдирди ҳәм мәмлекетимиз басшысы тәрепинен социаллық қорғаўға мүтәж балаларға жиберилген жаңа жыл саўғаларын салтанатлы түрде тапсырды.
Байрам кешесинде балаларға ҳәр қыйлы ертек қаҳарманлары қатнасыўындағы театрластырылыған сахналық көринислер қойып берилип, балалардың шадлы ҳәм қуўанышқа толы байрамына айланды.
Буннан соң кешеде районлық мәденият бөлими хызметкерлери ҳәм талантлы жаслар тәрепинен таярланған концерт бағдарламасы қойып берилди.
Адилбай Оразов,
Қарақалпақстан хабар агентлиги шолыўшысы