Мүбәрек Рамазан айында Елликқала районындағы кексе әўлад ўәкиллерине ҳүрмет көрсетилди. Районның социаллық-экономикалық раўажланыўына мийнети сиңген ветеранлардан, яғный, жәми 25 адамнан ибарат кексе әўлад ўәкиллери Самарқанд ҳәм Бухара ўәлаятына еки күнлик зыяратқа барып қайтты. Бул саўаплы ис – Қарақалпақстан Республикасы «Нураний» қоры, қордың Елликқала районлық бөлими, район ҳәкимлиги, «Топыраққала-тур» туристлик фирмасының көмегинде шөлкемлестирилди.
– Дәслеп Самарқандтағы Имам ал-Бухарий комплексин, соң Биринши Президентимиздиң қәбирин, Биби-ханым мавзолейин зыярат етип, Регистан майданындағы тарийхый комплекслерге бардық, – дейди Елликқала районы орайлық емлеўханасының биринши бас шыпакери, мийнет ветераны Абдирейим Юсупов. – Бухара ўәлаятында Баҳаўатдин Нақшбанд комплексин зыярат еттик.
– Елимиздеги дыққатқа ылайық орынларды зыярат еттик, көп нәрселерди еследик, нәзеримде тарийх және бир мәрте жаңаланғандай болды, – дейди тарийхшы илимпаз, Самандар Исмайлов. – Туристлер көп келетуғын бул орынларға барыўымыз тәсирлерге бай болды.
Еслетип өтемиз, бундай илажлар Өзбекстан Республикасы Президентиниң «Ишки туризмди жедел раўажландырыўды тәмийинлеў илажлары ҳаққында»ғы қарарының орынланыўын тәмийинлеў мақсетинде кең көлемде шөлкемлестирилмекте.
Қарақалпақстан хабар агентлиги