Усы жыл 13–14-апрель күнлери аралығында Қараөзек районлық балалар ҳәм жас өспиримлер спорт мектебинде спорттың волейбол түри бойынша 2004–2005-жыллары туўылған жас өспиримлер арасында (ер балалар) Қарақалпақстан Республикасы чемпионатының 1-тур ойынын өткериў режелестирилмекте.
Жарысқа республикамыздың барлық қала ҳәм районларынан оннан аслам командалар қатнасыўы күтилмекте.
Жарыс тийкарынан халықаралық волейбол федерациясы қағыйдаларына муўапық алып барылады. Жарыс айланба усылда өткерилип, оған команда қурамынан 14 спортшы, 1 тренер ҳәм 1 төреши қатнасады.
Жарыстың 1-2-3-орын жеңимпазлары Қарақалпақстан Республикасы Дене тәрбия ҳәм спорт бойынша мәмлекетлик комитети тәрепинен таярланған диплом ҳәм естелик саўғалары менен сыйлықланады.
Еслетип өтемиз, «Үмит нәлшелери-2018» спорт жарысларының Қарақалпақстан Республикалық басқышында волейбол бойынша Қараөзек районының ер балалардан қуралған командасы командалық есапта бириншиликти қолға киргизген еди.
Қатнасыўшыларға әўмет тилеп, бул ҳаққында толық мағлыўмат берип барамыз.
Қарақалпақстан хабар агентлиги