Өзбекстан Республикасы Олий Мажлиси Сенатының баслығы Т.Норбоева Женеваға сапары шеңберинде Пүткил жер жүзилик интеллектуаллық мүлк шөлкеми (ПИМШ) бас директоры Д.Танг менен ушырасты.
Ушырасыўда интеллектуаллық мүлкти қорғаў ҳәм Өзбекстанның ПИМШ Глобал инновациялық индексиндеги орнын жақсылаўға қаратылған, биргеликте әмелге асырылып атырған жумысларды даўам еттириў мәселелери додаланды.
Д.Танг Өзбекстанда интеллектуаллық мүлк ҳуқықларын қорғаў бойынша әмелге асырылып атырған өзгерислерди дыққат пенен бақлап баратырғанын, мәмлекет Президенти Шавкат Мирзиёев тәрепинен тасыйықланған 2022-2026-жыллары интеллектуаллық мүлк тараўын раўажландырыў стратегиясын пуқта үйренип шыққанын ҳәм усы стратегия тараўға мәмлекет итибарының жарқын дәлили екенлигин атап өтти.
Ушырасыўда ПИМШ Өзбекстанға миллий нызамшылықты және де жетилистириў, интеллектуаллық мүлкти қорғаўды күшейтиў, илим жетискенликлерин тараўларға енгизиў бойынша ҳәр тәреплеме жәрдем көрсетиўге таяр екенлиги билдирилди.
Тәреплер миллий брендлерди жаратыў талабы ҳәм географиялық атамаларды қорғаў зәрүр екенлигине итибар қаратты.
Сөйлесиў нәтийжесинде ПИМШ тәрепинен Өзбекстанның интеллектуаллық мүлк тараўындағы бир қатар басламаларын қоллап-қуўатлаў бойынша келисимге ерисилди.
ӨзА