Bugungi kunda Toshkent menejment va iqtisodiyot instituti yurtimizda dunyoqarashi keng, bilimli va zukko yosh kadrlarni tayyorlashga munosib hissa qo‘shib kelmoqda.
Institut talabalarga sifatli ta’lim berish borasida bir qator innovatsion dasturlarni amalga oshirmoqda. Xususan, institutda simulyator jarayonlari tashkil etilib, talabalar turli hayotiy vaziyatlar bo‘yicha keyslarni yechish orqali o‘z bilim va ko‘nikmalarini mustahkamlamoqda.
Shuningdek, sohaning yetakchi mutaxassislari institutga jalb qilinmoqda. IT, HR, buxgalteriya, moliya, iqtisod va deklarantlik kabi sohalarda yuqori malakali mutaxassislar tomonidan master-klasslar o‘tkazilmoqda.
Ta’lim jarayonini yanada samarali qilish uchun institutda tashkil etilgan biznes inkubator talabalar va bitiruvchilarga o‘z bizneslarini rivojlantirish va yangi loyihalarni amalga oshirishda qo‘llab-quvvatlashni maqsad qilgan. Bu borada institut KOICA kompaniyasi ekspertlari bilan hamkorlikda faol ishlamoqda. Bu ham talabalar uchun yangi imkoniyatlar yaratadi.
Shu bilan birga, institutda talabalar uchun bepul kurslar ham tashkil etilgan. Ular orasida notiqlik, rus tili, Project management, HR, kompyuter savodxonligi, dual ta’lim, buxgalteriya va deklarantlik kabi ixtisoslashgan kurslar mavjud. Bu kurslar talabalar uchun nafaqat bilimlarni mustahkamlash, balki ularning professional ko‘nikmalarini rivojlantirish imkoniyatini taqdim etadi.
Institutning Karera markazi tomonidan amalga oshirilayotgan “Kelajak Bunyodkorlari” loyihasi talabalarning har tomonlama rivojlanishini ta’minlashga qaratilgan. Loyiha maqsadi aqlan va jismonan sog‘lom, yuqori bilim va ko‘nikmalarga ega kadrlarni tayyorlashdir. Ushbu loyiha doirasida talabalarga nafaqat nazariy bilimlar, balki amaliy ko‘nikmalar ham beriladi, bu esa ularni bozor talablariga mos ravishda tayyorlaydi.
Umuman olganda, Toshkent menejment va iqtisodiyot instituti o‘zining ilg‘or tashabbuslari orqali talabalarini nafaqat yuqori sifatli ta’lim bilan ta’minlaydi, balki ularga muvaffaqiyatli professional faoliyat yuritish uchun zarur bo‘lgan barcha ko‘nikmalarni ham o‘rgatadi.
Gulnoza Boboyeva,
Nishonboy Abduvoitov(video),
O‘zA