19-август күни Ташкентте ШБШға ағза мәмлекетлер Қәўипсизлик кеңеслери хаткерлериниң 17-мәжилиси болып өтеди. Илаж Өзбекстанның ШБШға басшылығы шеңберинде өткерилип. Самарқандта болып өтетуғын Мәмлекет басшылары кеңесине таярлықтың әҳмийетли басқышы есапланады.
Мәжилисте ШБШға ағза ҳәм бақлаўшы мәмлекетлер Қәўипсизлик кеңеслериниң хаткерлери, сондай-ақ, ШБШ РАТШ Секретариатының ҳәм Атқарыў комитетиниң ўәкиллери қатнасады.
Күн тәртибине муўапық халықаралық ҳәм регионаллық қәўипсизликти тәмийинлеў, соның ишинде, терроризм, экстремизм, қурал ҳәм наркотик затлардың нызамсыз айланысына қарсы гүресиў, сондай-ақ, мәлимлеме қәўипсизлигин тәмийинлеў мәселелери көрип шығылады.
Илаж шеңберинде бирге ислесиўши мәмлекетлер делегацияларының басшылары менен еки тәреплеме ушырасыўлар да режелестирилген. ШБШға ағза мәмлекетлер Қәўипсизлик кеңеслери хаткерлериниң мәжилислери 2004-жылдан берли өткерип келинбекте ҳәм көп тәреплеме бирге ислесиўдиң муўапықластырыўшысы ҳәм мәсләҳәт механизми есапланады.
Қарақалпақстан хабар агентлиги