Өзбекстанда Украинадан 671 ўатанлас алып келинди. Эвакуация рейслери бүгин де даўам етеди.
Өзбекстанға ҳәзирги ўақытқа шекем Украинадан 1859 ўатанлас алып келинди. Соның ишинде, 2-марттың өзинде үш самолёт пенен жәми 671 өзбекстанлы Польшаның Катовице аэропорты арқалы Украинадан эвакуация етилди. Олардың арасында 129 ҳаял-қыз, 82 бала ҳәм 14 нәресте бар.
Ҳәзирги ўақытта Польша аймағында 1100 ден аслам Өзбекстан пуқарасы қалмақта. Олардың 550 и Польша шегарасындағы жыйналыў пунктине, және 550 и болса Катовице аэропортына жайластырылған. 3-март күни де бир неше эвакуация қатнаўын шөлкемлестириў режелестирилген.
Өзбекстан Сыртқы ислер министрлигиниң мәлим етиўинше, Украинадан эвакуацияланыўын күтип атырған Өзбекстан пуқаралары Польшаны 15-мартқа шекем тәрк етиўи зәрүр, болмаса жәриймаға тартылады. Усы сәнеге шекем Украина-Польша шегарасын жеке тәртипте визасыз кесип өтиўи мүмкин. Зәрүрлик пайда болғанда, елшиханалар менен байланысыў усыныс етиледи.
Қарақалпақстан хабар агентлиги