«Коррупцияға қарсы гүресиў жумысларының нәтийжелилигин рейтинг баҳалаў системасын енгизиў илажлары ҳаққында»ғы Президент қарары (ПҚ-81-санлы, 12.01.2022 ж.) қабыл етилди.
Қарарға муўапық, Коррупцияға қарсы гүресиў жумысларының нәтийжелилигин рейтинг баҳалаў системасы енгизиледи.
Онда рейтинг баҳалаў төмендеги 5 бағдар бойынша белгиленген индикаторлар тийкарында әмелге асырылады:
– мәмлекетлик шөлкемлерде коррупцияға қарсы гүресиў бойынша механизм ҳәм ҳуқықый тийкарлардың жаратылғаны ҳәм әмелиятқа енгизилгени;
– коррупциялық қәўип-қәтерлерди анықлаў, баҳалаў ҳәм оларды азайтыў бойынша илажлардың әмелге асырылғанлығы;
– мәмлекетлик шөлкемлер басшыларының коррупцияға қарсы маўасасыз мүнәсибетти көрсетиўши ҳәрекетлериниң бар екенлиги;
– хызметкерлердиң коррупцияға қарсы гүресиўге байланыслы ишки тәртип-қағыйдалардан хабардарлығы ҳәм бул тараўда билим ҳәм көнликпелерди арттырыў бойынша илажлардың әмелге асырылғанлығы;
– коррупцияға қарсы гүресиў бойынша тийисли тараў ямаса тармақ кесиминде халықтың ҳуқықый сана-сезими менен мәдениятын арттырыў, бул иллетке маўасасыз мүнәсибетти қәлиплестириўге қаратылған үгит-нәсиятлаў илажларының нәтийжелилиги.
Рейтинг баҳалаў системасы 2022-жыл 1-февральдан баслап, эксперимент тәризинде, өз жумысында коррупцияға қарсы менеджмент системасын енгизип атырған 26 мәмлекетлик шөлкемлердиң жумысына, 2022-жыл 1-июльден барлық мәмлекетлик шөлкемлердиң жумысына енгизиледи.
Рейтин баҳалаў «E-Anticor.uz» электрон платформасы арқалы шөлкемлестириледи.
Қарақалпақстан хабар агентлиги