Өзбекстан Республикасы Президенти Шавкат Мирзиёев 24-декабрь күни Әзербайжан Республикасы Президенти Илҳом Алиев пенен телефон арқалы сөйлести
Мәмлекетимиз басшысы Илҳом Алиевти 60 жыллық юбилейи менен қызғын қутлықлап, оған беккем денсаўлық, абаданлық ҳәм үлкен табыслар, дос Әзербайжан халқына болса тынышлық-татыўлық ҳәм раўажланыў тиледи.
Жетекшилер Өзбекстан – Әзербайжан стратегиялық шериклик ҳәм көп қырлы бирге ислесиў қатнасықларының күн тәртибиндеги әҳмийетли мәселелерди көрип шықты.
Саўда-экономикалық байланыслар унамлы пәт пенен раўажланып баратырғаны қанаатланыўшылық пенен атап өтилди: өз-ара саўда көрсеткишлери турақлы артып бармақта, жетекши кәрханалар кооперациясы кеңеймекте. Усы айда Баку қаласында санаат көргизбеси ҳәм Исбилерменлер кеңесиниң гезектеги мәжилиси табыслы өткерилди. Еки тәреплеме мәдений-гуманитарлық бағдарлама шеңберинде жедел алмасыўлар даўам етпекте.
Мәмлекет басшылары тийкарғы тармақ ҳәм бағдарларда, соның ишинде, машина қурылысы, энергетика, аўыл хожалығы, транспорт ҳәм логистика тараўларында әмелий бирге ислесиў бойынша жойбарларды әмелге асырыў әҳмийетли екенин атап өтти.
Регионаллық сиясат ҳәм халықаралық шөлкемлер шеңбериндеги бирге ислесиў мәселелери бойынша да пикир алысылды. Болажақ илажлар режеси көрип шығылды.
Телефон арқалы сөйлесиў әддетегидей қызғын ҳәм дослық руўхында болып өтти.
ӨзА