Өзбекстан Республикасы Президенти Шавкат Мирзиёев 24-июль күни Қырғыз Республикасы Президенти Садир Жапаров пенен телефон арқалы сөйлести.
Президент Садир Жапаров мәмлекетимиз басшысын туўылған күни менен шын жүректен қутлықлап, дос Өзбекстан халқына абаданлық ҳәм раўажланыў тилеклерин билдирди.
Еки тәреплеме күн тәртиби ҳәм регионаллық бирге ислесиўге байланыслы әҳмийетли мәселелер додаланды.
Усы жылдың 11-12-март күнлери Ташкент қаласында болып өткен жоқары дәрежедеги Өзбекстан-Қырғызстан саммити даўамында ерисилген келисимлерди әмелге асырыў зәрүр екени атап өтилди. Энергетика, транспорт, машина қурылысы, фармацевтика ҳәм басқа да тармақлардағы биргеликтеги жойбарларды жедел алға қойыўға айрықша итибар қаратылды.
Жақында өткерилген Орайлық ҳәм Қубла Азияның байланыслылығын күшейтиў мәселелери бойынша халықаралық конференцияның регионымызда қәўипсизлик, турақлылық ҳәм үзликсиз раўажланыўды тәмийинлеўдеги әҳмийетли орны атап өтилди.
Сондай-ақ, болажақ илажлар режеси, соның ишинде 6-август күни Түркменстанда Орайлық Азия еллери жетекшилериниң Мәсләҳәт ушырасыўын өткериў мәселеси көрип шығылды.
ӨзА