Үргенш қаласында волейбол бойынша биринши мәрте өткерилген ветеранлар арасында Өзбекстан чемпионатында Қарақалпақстан Республикасы сайланды командасы екинши орынды ийеледи.
Белгили спортшы Аллаяр Казаков басшылық еткен командамыз ярым финальда Ферғана ўәлаяты ветеранлары командасы үстинен жеңиске ерисип, финальға жоллама алды. Әндижан ўәлаяты командасы менен болып өткен финаль беллесиўинде республикамыз командасы 25:10, 25:11 есабында жеңилиске ушырап, сыйлы екинши орынды ийеледи. Командамыз қурамында Нөкис қаласынан Азат Казаков, Бахрам Казаков, Асқар Табынбаев, Салибай Сейтов, Аңсатбай Ерлепесов, Расул Машарипов, Маман Сарыбаев, Беруний районынан Нурбек Аллабергенов, Қараөзек районынан Нурабулла Мнажев, Төрткүл районынан Рузимбай Қурбанбаев шеберлиги менен көзге түсти.
Бердақ атындағы Қарақалпақ мәмлекетлик университетинде республикамыздың сайланды командасын сыйлықлаў мәресими болды. Онда Қарақалпақстан Республикасы «Veteran sportshi» мәмлекетлик емес коммерциялық емес шөлкеми тәрепинен естелик саўғалары тапсырылды.
Қарақалпақстан хабар агентлиги