Усы жыл 22-февраль күни Нөкис қаласында «Коронавирусқа қарсы шаншыў» атамасында ғалаба хабар қураллары ушын семинар-тренинг өткерилди.
Семинар-тренинг Өзбекстан журналистлерин қайта таярлаў орайы Санитария-эпидемиологиялық тынышлық ҳәм жәмийетлик саламатлық хызмети ҳәм UNICEF балалар шөлкеми менен биргеликте өткерилип, оған республикамыз ҳәм Хорезм ўәлаяты ғалаба хабар қуралларының хызметкерлери қатнасты.
Онда Өзбекстанда COVID-19 ға қарсы шаншыў процеси, COVID-19 темасындағы материаллардың ғалаба хабар қуралларында жарытылыўын таллаў, бүгинги күндеги иммунизация ҳәм коронавирус ҳаққында тарқалып атырған әпсаналар, қәте пикирлер, COVID-19 ға қарсы вакциналар ҳаққында семинар қатнасыўшыларына видеоролик ҳәм презинтациялар жәрдеминде кең түрде мағлыўматлар берилди.
– Республикамыз бойлап COVID-19 ға қарсы шаншыўға таярлық көриўдиң бир бөлеги сыпатында ғалаба хабар қураллары ушын семинар-тренинглер өткерилмекте. Мине, бүгин биз Хорезм ўәлаятының блогерлери Нөкис қаласына келдик. Семинар оғада қызықлы ҳәм мазмунлы болып өтпекте. Илаж даўамында көплеген мағлыўматларға ийе болдық – дейди блогер Наргиза Рахимова
Семинар даўамында журналистлер арасында алған мағлыўматлары тийкарында мақала таярлаў шеберлигин анықлаў мақсетинде интерактив ойын шөлкемлестирилди.
Илаж жуўмағында семинар темасы бойынша материаллар таярлаў режеси ислеп шығылды.
Сондай-ақ, журналист ҳәм блогерлер өзлерин қызықтырған сораўларына жуўап алды.
Т.СЕЙТНАЗАРОВА,
Қарақалпақстан хабар агентлигиниң шолыўшысы