Өзбекстан «Миллий тикланиш» демократиялық партиясы Нөкис қалалық Кеңесиниң усынысы менен «Боз аўыл» мәкан пуқаралар жыйынында жасайтуғын ҳаял-қызлар арасында Республикалық ҳаял-қызлардың реабилитация орайының психологы Роза Аманова тәрепинен «Инсан өзгерсе, жәмийет өзгереди» атамасында сәўбетлесиў кешеси өткерилди.
– Жақында, Қарақалпақстан Республикасы Жоқарғы Кеңесине 7-«Темир жол» сайлаў округинен сайланған депутат Орынбай Бекбергеновтың өз аймағындағы сайлаўшылары менен өткерген ушырасыўында ҳаял-қызлардың медициналық тексериўге мүтәжлиги ҳәм айырымларында руўхый түскинлик бар екенлигине гүўа болған едик,-дейди партияның Нөкис қалалық Кеңесиниң жетекши қәнигеси Г.Джумагулова. – 19-20-январь күнлери медициналық тексериўге мүтәж ҳаял-қызлар бийпул түрде Республикалық қәнигелестирилген онкология ҳәм радиология илимий-әмелий медицина орайы Қарақалпақстан филиалында тереңлестирилген медициналық тексериўден өткерилди.
Сәўбетлесиў даўамында ҳәр бир ҳаял-қыз өзин ҳәм өмирди сүйиў, жаңа мотивация ҳәм жеке раўажланыў бойынша кең түсиниклер алды.
Сәўбетлесиўден кеўли толған қатнасыўшылар шөлкемлестириўшилерден ҳәм машқалаларын шешиўге жәрдем көрсетип атырған депутатлардан миннетдар екенин атап өтти.
Қарақалпақстан хабар агентлиги