Берунийде «Cobalt» ҳәм «Nexia-3» соқлығысыўы ақыбетинде бир адам қайтыс болды

Беруний районында түнде жүз берген жол-транспорт ҳәдийсеси ақыбетинде бир адам өмирден көз жумды. Бул ҳаққында ҚР ИИМ ЖҲҚБ баспасөз хызмети хабар берди.

 

Хабарда мәлим етилиўинше, 2020-жылдың 8-ноябрь күни Беруний районы аймағынан өтиўши А-380 жолының 625-километринде қәўипли бурылмада «Nexia-3» басқарыўшысы автомобиль басқарыўын жоғалтып, «Cobalt»тың жолына шығып кеткен ҳәм ЖТҲ жүз берген. Ҳәдийсе ақыбетинде «Nexia-3» жанбаслап қалған, «Cobalt» автомашинасы ишиндеги жолаўшы аўыр дене жарақатын алып, ўақыя орнында қайтыс болған.

Беруний районлық ИИБ ЖҲҚБ баслығы Д.Юлдашевтиң мәлим етиўинше, ҳәдийсениң жүз бериўине 2-категориядағы автомобиль жолының қатнаў бөлегиниң оңланбағаны, жақтыландырыў үскенелериниң жоқ екенлиги, жатық сызықлар өшип кеткени де себеп болған.

 

Беруний районлық автомобиль жоллардан пайдаланыў унитар кәрханасы баслығы А.Хўжаев 2-категориядағы трассада қәўипли бурылма, жол кесилиспелери бойынша арнаўлы жол белгилериниң орнатылғанлығы, жолдың қурылғанына 50 жылдай ўақыт болғаны, көшеде ҳәр жылы ағымдағы оңлаў жумысларының алып барылыўы, бирақ капитал оңлаў жумыслары әмелге асырылмағаны, жатық сызықлар сызылғанынан соң алты ай ўақыт өткени ҳәм олар өшип кеткенин билдирген. Ол жолды тегислеў ҳәм жақтыландырыў бойынша илажларды әмелге асырылыўын атап өткен.

 

Ислам Матеков,

Қарақалпақстан хабар агентлиги.

  13.11.2020, 16:14  |    68 мәрте көрилди