Елимизде пахта санаатын раўажландырыўға салмақлы үлес қосқан инсан, Қарақалпақстан Республикасына мийнети сиңген санаат хызметкери Атаулла Маткаримович Худайбергенов 80 жасында дүньядан өтти.
А.Худайбергенов 1940-жылы Төрткүл районында белгили шаңарақта туўылып камалға келди.
Ол пахта санааты тараўындағы мийнет жолын 1960-жыллардан баслады. 1966-1975-жыллары Төрткүл пахта тазалаў заводына, 1975-1986-жыллары Қарақалпақпахтасанааты трестине жемисли басшылық етти. 1998-2007-жыллары Қоңырат пахта тазалаў кәрханасын басқарды.
Ол мийнет сүйгишлиги, өз исине пидайылығы, тараўдың экономикасын, материаллық-техникалық базасын көтериўдеги искерлиги менен айрықша көзге түсти.
Ҳақ кеўил инсан, әдиўли әке, меҳрийбан устаз Атаулла аға Худайбергеновтың естелиги жүреклеримизде бәрқулла сақланып қалады.
Атаулла Худайбергеновтың шаңарағына, перзентлерине ҳәм туўған-туўысқанларына терең қайғырыў менен кеўил билдиремиз.
Хош бол, Атаулла аға!
Қарақалпақстан хабар агентлиги