Нормативлик-ҳуқықый ҳүжжетлердиң жойбарлары порталында Өзбекстан Республикасы Министрлер Кабинетиниң «Ташкент қаласында «Япония санлы университети»н шөлкемлестириў ҳаққында»ғы қарарының жойбары додаланды.
Жаңа университет Японияның «Digital knowledge» акционерлик жәмийети шөлкемлестириўиндеги айрықша мүлк ҳәм еркин балансқа ийе болған юридикалық тәреп дәрежесиндеги устав фондында мәмлекетлик үлеси болмаған мәмлекетлик емес жоқары билимлендириў шөлкеми есапланады.
Ҳүжжетке муўапық, усы жоқары билимлендириў мәкемесине студентликке қабыл етиў ҳәм питкериўшилердиң аттестациясы усы университет тәрепинен Өзбекстан Республикасы Жоқары ҳәм орта арнаўлы билимлендириў министрлиги ҳәм Өзбекстан мәмлекетлик жәҳән тиллери университети менен келисилген ҳалда белгиленетуғын талаплар, тәртип ҳәм мүддетлерге муўапық әмелге асырылады.
«Еки тәреплеме диплом» (double degree) бағдарламадары тийкарында оқыўын табыслы тамамлаған Университет питкериўшилерине Өзбекстан мәмлекетлик жәҳән тиллери университети тәрепинен «Компьютер лингвистикасы» бағдарында мәмлекетлик үлгидеги дипломы және Япония ҳәм Өзбекстан Республикасында тән алынатуғын Японияның Отемае университети, Токио онлайн университети ҳәм басқа да университетлеринен биреўиниң тийисли бағдарлары бойынша белгиленген үлгидеги дипломлары бериледи.
Ташкент қаласындағы «Япония санлы университетин»де 2020/2021 оқыў жылынан баслап билимлендириў процеси басланады ҳәм инженер-программист ҳәм бизнес-басқарыўшы бакалавриат билимлендириў бағдарларында қәнигелер таярлаў жолға қойылады.
Қарақалпақстан хабар агентлиги