Қараөзек районындағы орайлық стадионда Мәмлекетимиз Президенти, Қураллы Күшлер Жоқары Бас Сәркардасы Шавкат Миромонович Мирзиёевтиң жеке басламасы менен елимизде алып барылып атырған «Абат аўыл» ҳәм «Абат мәҳәлле» мәмлекетлик бағдарламасының орынлаўын тәмийинлеў, республикамызда алып барылып атырған қурылыс ҳәм абаданластырыў жумысларына жәрдем бериӯ мақсетинде келген Өзбекстан Республикасы Айрықша жағдайлар министрлигиниң бир топар әскерлериниң әскерий ант тапсырыӯ мәресими болып өтти.
Илажда район ҳәкими У.Утамбетов, Өзбекстан Республикасы Айрықша жағдайлар министрлигиниң басқарма баслығы, полковник Т. Муҳаммадзиёевлар жас әскерлерди ана-Ӯатанымызға ҳадал хызмет етиўге шақырып, олардың ата-аналарына жақсы тилеклерин билдирди.
Буннан соң республикамызға өзлериниң азаматлық ӯазыйпасын атқарыӯ ушын келген әскерлер тәрепинен әскерий ант қабыл етилди.
Илажда елимиздиң басқа ўәлаятларынан келген әскерлердиң ата-аналары перзентлери менен көрисип, оларды әскер болғаны менен қутлықлады.
Илаж районлық Мәденият бөлими хызметкерлериниң атқарыўындағы концерт бағдарламасы менен қызғын даўам етти.
Бундай әскерий ант қабыллаӯ мәресимлери Шымбай, Кегейли ҳәм Тахтакөпир районларында да болып өтти.
Қарақалпақстан хабар агентлиги