Нормативлик-ҳуқықый ҳүжжетлер жойбарларын додалаў порталында Министрлер Кабинетиниң «Мәмлекетлик емес билимлендириў мәкемелерин қоллап-қуўатлаў системасын және де жетилистириў илажлары ҳаққында»ғы қарары жойбары жәрияланды, деп хабар бермекте Daryo.uz Podrobno.uz хабары тийкарында.
Ҳүжжет жойбарына муўапық, Өзбекстанда мәмлекетлик емес билимлендириў мәкемелериниң питкериўшилерине аттестатлар берилиўи Билимлендириў сапасын қадағалаў бойынша Мәмлекетлик инспекциясы тәрепинен жуўмақлаўшы аттестацияға жиберилген питкериўшилердиң санынан келип шыға отырып, аттестатлар бериў ушын жеке меншик мектеплерден келип түскен мүрәжатлар тийкарында әмелге асырылады.
Соның менен бирге, Мәмлекетлик инспекция жеке меншик мектеп питкериўшилерине берилетуғын аттестатлардың үлгилерин ғәрезсиз түрде ислеп шығады ҳәм тастыйықлайды.
Атап өтилиўинше, мәмлекетлик емес билимлендириў мәкемелери питкериўшилерине берилетуғын аттестатлар оларға кейинги дәрежедеги билимлендириў мәкемелеринде оқыўын даўам еттириў ҳуқықын береди.
Еки айлық мүддет ишинде Мәмлекетлик инспекцияға Министрлер Кабинетине жеке меншик мектеплер питкериўшилерин жуўмақлаўшы аттестациядан өткериў тәртибин ислеп шығыў ҳәм тастыйықлаўға киргизиў ўазыйпасы жүкленеди.
Қарақалпақстан хабар агентлиги