Өзбекстанның жаңадан тайынланған елшиси Сардор Рустамбоев Делидеги «Раштрапати Бҳаван» сарайында Ҳиндстан президенти Драупади Мурмуға исеним жарлықларын тапсырды.
«Дүнья» хабарына бола, рәсмий мәресимнен кейин болып өткен сәўбет ўақтында Өзбекстан ҳәм Ҳиндстан арасындағы көп тәреплеме бирге ислесиўдиң бүгинги жағдайы ҳәм оны және де раўажландырыў перспективалары додаланды.
Жоқары дәрежелердеги турақлы ушырасыўлар ҳәм сөйлесиўлер еки мәмлекеттиң көп тәреплеме және өз-ара пайдалы бирге ислесиўди беккемлеўдеги күшли сиясий ерк-ықрары ҳәм исенимин тастыйықлап атырғаны, стратегиялық шерикликти сапа жағынан жаңа басқышқа алып шығыў имканиятын усынып атырғаны атап өтилди.
Сиясий, саўда-экономикалық ҳәм мәдений-гуманитарлық тараўларда бирге ислесиўди жеделлестириў ушын үлкен потенциал ҳәм өз-ара умтылыс бар екени атап өтилди.
Еки тәреплеме бирге ислесиўдиң заманагөй жағдайы жоқары баҳаланып, барлық тараўларда өз-ара пайдалы байланыслар буннан былай да раўажланатуғынына исеним билдирди.
Өзбекстанның жаңа елшиси Сардор Рустамбоев 2024-жыл 25-январь күни Делиге жетип келген еди. Оған шекем ол мәмлекеттиң Франциядағы дипломатиялық ўәкилханасына басшылық еткен.
Қарақалпақстан хабар агентлиги