Президентимиздиң тапсырмасына тийкарланып Сурхандәрья ўәлаятындағы Ҳайратан шегара өткериў пункти арқалы қоңсы Аўғанстанға гуманитарлық жәрдем жиберилди. Зәрүр азық-аўқат өнимлеринен ибарат 185 тоннадан зыят жүклер кәрўаны қоңсы мәмлекеттиң Балх ўәлаятының арқа тәрепиндеги Ҳайратан қаласына жеткерилди.
Гуманитарлық жәрдем қурамында 48 тонна ун, 48 тонна бийдай, 15,7 тонна өсимлик майы, 10 мың 20 дана консерваланған гөш өнимлери, 22 тонна макарон, 24 тонна қумшекер ҳәм 100 мың тез таярланатуғын лапша бар.
Усы мүнәсибет пенен Ҳайратан қаласындағы «Астрас» компаниясының жанында Өзбекстан Республикасы Президентиниң Аўғанстан бойынша арнаўлы ўәкили Исматулла Иргашев, Сурхандәрья ўәлаяты ҳәкиминиң биринши орынбасары Анвар Орипов, Аўғанстан экономика министри Дилмуҳаммад Ҳаниф ҳәм басқа да рәсмийлердиң қатнасыўында гуманитарлық жәрдемин тапсырыў мәресими болып өтти.
Сондай-ақ, еки мәмлекет рәсмийлериниң қатнасыўында аймақлардың өз-ара саўда-экономикалық ҳәм гуманитарлық тараўдағы бирге ислесиўин раўажландырыў бойынша сөйлесиўлер өткерилди.
Аўғанстанлы рәсмийлер Мүбәрек Рамазан айында көрсетилип атырған әмелий жәрдем ушын Өзбекстан халқына миннетдаршылық билдирди.
Холмўмин МАМАТРАЙИМОВ,
ӨзАның хабаршысы