Қанлыкөл районында өткен жылы «Абат аўыл» бағдарламасы бойынша жәми 17 объектте ири қурылыс, оңлаў ҳәм реконструкциялаў жумысларының әмелге асырылыўы белгиленген еди.
Соннан, бүгинги күнде райондағы Наўрыз АПЖ дағы Ахун аўылда 60 орынлы балалар бақшасы имаратын жаңадан қурыў, 12,8 километрлик ишимлик суў тармақларын, Қанлыкөл ППЖ да 6,8 километрлик ишимлик суў тармақларын жаңадан тартыў жумыслары толық жуўмақланған.
– Соның менен бирге, Наўрыз АПЖ Ахун аўылындағы 6,5 километрлик онлаған ишки жолларды ҳәм 0,8 километрлик үш көшени оңлаў жумыслары алып барылып, бул жумыслар да толық жуўмақланды,-дейди Қанлыкөл районы ҳәкиминиң қурылыс, коммуникациялар, коммунал хожалық, экология ҳәм көклемзарластырыў мәселелери бойынша орынбасары М.Төрениязов. – Сондай-ақ, Қанлыкөл ППЖдағы бир қатар көшелердиң жәми 7,3 километрлик бөлегинде оңлаў ҳәм 0,3 километрлик бөлегинде жеңил оңлаў жумыслары алып барылды.
Наўрыз АПЖда 6,1 километрлик электр тармақлары тартылып, еки трансформатор, 122 дана электр бағана ағашы жаңадан орнатылды. Ал, Қанлыкөл ППЖда жәми 5,2 километрлик электр тармақлары тартылып, ол жерге де еки дана трансформатор, 104 дана электр бағана ағашы орнатылып, халықтың электр энергиясына болған талабы жақсыланды.
Соның менен бирге, Наўрыз АПЖ Ахун аўылда 0,4 километрлик газ тармақларын оңлаў ҳәм 2 дана ГРП ларды оңлаў, Қанлыкөл ППЖда 0,8 километрлик газ тармақларын оңлаў ҳәм 2 дана ГРП ларды оңлаў, Наўрыз АПЖ Ахун аўылда 1 километрлик пиядалар жолларын қурыў, 30 дана түнги жақтыландырыў шырақларын орнатыў, 3 километрлик оптикалық байланыс кабеллерин тартыў, 56 турақ жайдың фасадын, төбесин оңлаў әмелге асырылды.
Қанлыкөл ППЖ да 1 километрлик пиядалар жолын қурыў, 50 дана түнги жақтыландырыў шырақларын орнатыў, 1 километрлик оптикалық байланыс кабеллерин тартыў, 67 турақ жайдың фасадын ҳәм төбесин оңлаў жумыслары әмелге асырылды.
Бул бағдардағы жумыслар даўам етпекте.
Ә.Жийемуратов,
Қарақалпақстан хабар агентлиги