Исроилнинг амалдаги бош вазири Биньямин Нетаньяху учта моддада: порахўрлик, фирибгарлик ва ишончни суиистеъмол қилишда айбланмоқда. Суд жараёни келаси йилнинг февралида бўлиши кутилмоқда. Бу ҳақда Исроил Олий судига таяниб, “Анадолу” агентлиги хабар берди.
Ғазо секторидаги уруш туфайли бош вазир тингловларга мунтазам қатнаша олмаётгани учун ҳафтада икки марта учрашувлар ўтказишга қарор қилинганлиги айтилади.
Бироқ февраль ойигача коррупция, фирибгарлик ва ишончни суиистеъмол қилишда гумон қилинаётган Нетаньяху устидан суд жараёни тўлиқ ишга тушиши мумкин. Шунингдек, у ўз манфаати эвазига дабдабали совғалар олганликда гумон қилинмоқда. Терговда молиялаштириш билан боғлиқ бошқа ҳолатлар ҳам ўрин олган. Нетаньяхуга қарши 2020 йилдан бери давом этаётган суд жараёни Исроил ва Хамас ҳаракати ўртасидаги зиддият кучайгач, вақтинча тўхтатилган эди. Келаси йил февраль ойида давом эттирилиши кутилаётган судда унинг айблари тасдиқланса, коррупция моддасига кўра у узоқ муддат қамоқ жазосига ҳукм қилиниши мумкин. Қолган ҳолатлар учун 3 йилгача қамоқ жазоси назарда тутилган. Бош вазирнинг ўзи эса айбсизлигини таъкидлаб, ҳар учала айбловни ҳам рад этиб келади.