Davlatimiz rahbarining joriy yil 6-mart kuni qabul qilingan “8-mart – Xalqaro xotin-qizlar kuni munosabati bilan mukofotlash toʻgʻrisida”gi farmoniga muvofiq Vatanimiz ravnaqi, xalqimiz farovonligi, sogʻlom va barkamol avlod tarbiyasi, oila va jamiyat asoslarini mustahkamlash yoʻlidagi munosib xizmatlari uchun bir guruh xotin-qizlar yuksak unvon, orden va medallar bilan mukofotlandi. 4-martdagi Prezident qaroriga binoan esa yigirma sakkiz nafar faol qiz Zulfiya nomidagi Davlat mukofoti bilan taqdirlandi.
Bugun poytaxtimizda boʻlib oʻtgan Xalqaro xotin-qizlar kuni munosabati bilan bayram tadbirida ana shu yuksak mukofotlar tantanali ravishda topshirildi.
Shuningdek, joylarda onalik va bolalikni himoya qilish, yoshlarni vatanparvarlik ruhida tarbiyalash boʻyicha namunali faoliyat olib borayotgan 287 nafar xotin-qizga “Moʻtabar ayol” nishonlari berildi.
Qoraqalpogʻiston Respublikasi, Toshkent shahri va viloyatlardan tashrif buyurgan xotin-qizlar, turli vazirlik va idoralar xodimlari toʻkin dasturxon atrofida bayramni nishonladi. Tadbirda mamlakatimizda faoliyat yuritayotgan chet ellik diplomat ayollar, xalqaro tashkilotlar vakolatxonalari vakillari ham ishtirok etdi.
Bayram katta konsert dasturi bilan yakunlandi.
O’zA