Xalqaro dzyudo federatsiyasi musobaqadan keyin yangi olimpiada reytingini eʼlon qildi. Biz uchun quvonarlisi, 60 kg.gacha vazn toifasida jahon chempionatining kumush medalini qoʻlga kiritgan hamyurtimiz Sharofiddin Lutfullayev avval egallab turgan oʻrni – toʻrtinchi pogʻonadan birvarakayiga reyting peshqadamiga aylandi. Endilikda Surxondaryo zaminida tugʻilib oʻsgan polvon hisobida 3 607 ochko bor.

Reytingning ikkinchi pogʻonasidan 3 510 ochko bilan jahon chempionatining bronza medali sovrindori qozogʻistonlik Yeldos Smetov joy olgan. Amaldagi jahon chempioni gruziyalik Lukxumi Chxvimiani esa 3 386 ochko bilan kuchli uchlikka yakun yasab bergan. Shu kunga qadar reytingni boshqarib kelgan yaponiyalik dzyudochi esa yangi reytingda 4-oʻringa tushib ketdi.

Umid qilamizki Sharofiddin Lutfullayev reytingdagi peshqadamligini endi Tokio olimpiadasiga qadar boy bermaydi va toʻrt yillikning eng nufuzli sport anjumanida ham Vatanimiz sharafini munosib himoya qiladi.