Oʻzbekiston xalq shoiri Jamol Kamolni katta va oʻrta avlod vakillari yaxshi biladi. Kimdir qalami oʻtkir shoir, deb bilsa, kim uchundir u jahon klassik adabiyoti namunalarining mohir tarjimoni.
“Abadiyat ostonasida“ kitobida yurtimiz mustaqilligi arafasi va mustaqillik yillarida bitilgan, jamiyat hayotining dolzarb masalalariga bagʻishlangan maqolalari, ijodkorlar haqidagi adabiy mushohadalari, xotiralari jamlangan. Kitob soʻnggida “Chor darvesh va Zarafshon yodi“ kinoqissasi ham ilova etilgan.
Jahon iqtisodiyoti va diplomatiya universitetida oʻtkazilgan “Abadiyat ostonasida“ kitobining taqdimotida adabiyotshunoslar, olimlar, talaba-yoshlar mana shunday oʻtkir mulohazalar, fikrlar egasi Jamol Kamol suhbatidan bahramand boʻldi.
– Ijodkorlar bilan uchrashish hamisha bayram maqomida boʻladi, – deydi professor Narzulla Joʻrayev. – Jamol Kamol kabi tarjimon, shoirlar kamdan-kam tugʻiladi. Bu inson xalqimiz, adabiyotimiz, umuman maʼnaviyatimiz uchun juda katta xizmat qilib kelmoqda.
Tadbir soʻnggida shoir sheʼrlarini mahorat bilan oʻqigan, shoirga eng mazmunli va qiziqarli savol bergan talabalarga muallif dastxati tushirilgan Jamol Kamol “Saylanma“sining uch jildi sovgʻa qilindi.
