Poytaxtimizda mahalladagi yoshlar yetakchilari I Forumining ochilish marosimi bo‘lib o‘tdi.

Yoshlar ijod saroyida ikki kun davom etadigan mazkur forumda “Yilning eng namunali mahalla yoshlar yetakchisi” tanlovining hududiy bosqichi g‘oliblari, faol yoshlar yetakchilari va hamkor tashkilotlar ekspertlari ishtirok etdi.

Ishtirokchilar tadbirda “Yoshlar forumi”, mahalladagi yoshlar yetakchilari faoliyatining 3 yillik sarhisobi, amalga oshirilgan ishlar tahlili va istiqboldagi rejalar bo‘yicha hamkor tashkilotlar bilan o‘zaro tajriba almashdi.

Xususan, “Yoshlar forumi” doirasida yoshlarning sektor rahbarlari, hokimlar, vazirlar bilan uchrashuvlari tashkil etilmoqda. Mega loyihalar taqdimotlari, Birinchi o‘quv markazlari forumi, “Besh tashabbus olimpiadasi” doirasida “Kasblar tanlovi”, “Ibrat farzandlari” olimpiadasi, Kibersport musobaqasi, “Yosh musavvir”, “Yosh kitobxon oila” tanlovlari o‘tkazilmoqda. “Z-avlod” forumi doirasida Bolalar harakati Respublika sardorlari saylovi, milliy media kontent super premeralari, “O‘zbekiston belgisi” ko‘krak nishonini topshirish marosimi va boshqa yorqin loyihalar bo‘lib o‘tmoqda.

Uchrashuv davomida mamlakatimizning faol tadbirkorlari tomonidan yoshlarga loyihalar va jamoa boshqaruvi, liderlik ko‘nikmalari hamda tadbirkorlikda muhim hisoblangan bilimlar hamda tajribadan o‘tgan tavsiyalar berilmoqda.

Gulnoza Boboyeva, O‘zA