Unda Oliy sud, Qoraqalpog‘iston Respublikasi sudining jinoyat, fuqarolik va iqtisodiy ishlar bo‘yicha sudlov hay’ati sudyalari, tuman, shahar va tumanlararo sudi raislari hamda Qoraqalpog‘iston Respublikasi ma’muriy sudi sudyalari ishtirok etdi.

Ta’kidlanganidek har bir Plenum qarori sud amaliyotidagi bir qancha masalalarga aniqlik kiritib, sud ishlari sifatini oshirishda katta yordam beradi. Shuning uchun ham Plenum qarorlarini izchil o‘rganish, mazmun-mohiyatini to‘la anglab yetish o‘zining ijobiy samarasini beradi.

Tadbirda asosiy e’tibor Oliy sud Plenumining “Odil sudlovni amalga oshirishda O‘zbekiston Respublikasi Konstitutsiyasi normalarini to‘g‘ridan-to‘g‘ri qo‘llashning ayrim masalalari to‘g‘risida”, “Intellektual mulkka oid ishlarni ko‘rib chiqishning ayrim masalalari to‘g‘risida”, “Reabilitatsiya etilgan shaxsga yetkazilgan ziyonni qoplash va uning boshqa huquqlarini tiklash bo‘yicha sud amaliyotining ayrim masalalari to‘g‘risida” va “Firibgarlikka oid ishlar bo‘yicha sud amaliyoti to‘g‘risida”gi qarorlarini amaliyotda qo‘llash masalasiga qaratildi. So‘zga chiqqanlar mazkur Plenum qarorlarining mazmun-mohiyati, ularni amalda qo‘llash borasida yuzaga kelishi mumkin bo‘lgan muhim masalalarga to‘xtaldi.

Tadbirda barcha sudyalar amaliyotda uchrayotgan masalalar yuzasidan savollar, fikr-mulohazalar bilan faol ishtirok etdi. Har bir savol, fikr-mulohazalar yuzasidan Oliy sud sudyalari tomonidan batafsil tushuntirishlar berildi.

Dovud ABIBULLAEV,  

O‘zA muxbiri