«Манчестер Юнайтед» ҳүжимшиси Криштиану Роналду Премьер Лига 29-туры шеӊберинде «Тоттенхэм»ға қарсы өткен беллесиўде (3-2) хет-трикке еристи.
Роналду клуб ҳәм сайланды командалар көлеминде өзиниӊ рәсмий голлар санын 807 ге жеткерип алды. Бул футбол тарийхындағы еӊ жақсы көрсеткиш. Rec.Sport.Soccer Statistics Foundation (RSSSF) есап-санақларына бола, Роналду Йозеф Бицанныӊ (805 та гол) рекордын жаӊалаған.
Бицан, Пеле ҳәм өтмиштеги басқа футболшылар урған голлар саны түрли дәреклерлерде ҳәр қыйлы етип берилгенлигин атап өтиў керек. Исенимли дәреклер арасында RSSSF’да Бицан көрсеткиши жоқарырақ еди. Буннан алдынғы басқа мағлыўматлар Роналдуны футбол тарийхындағы еӊ жақсы ҳүжимши сыпатында көрсеткен еди.
Бул португалиялы футболшы ушын 59-хет-трик болды. Әйне пайытта футбол ойнап атырған ойыншылар арасында тек ғана Месси 55 хет-трик пенен оған жақынласып келмекте.
Адилбай Оразов,
Қарақалпақстан хабар агентлиги шолыўшысы