Усы жылдың 26-июль күни Нөкис қаласындағы «Туран» стадионында Президент мектебине талабанлар ушын тест сынақларының дәслепки басқышы болып өтти.
Өзбекстан Республикасы Президенти Ш.Мирзиёев 2018-жылы Қарақалпақстан Республикасына сапары ўақтында Президент мектеплерин ашыў ҳәм оны Нөкис қаласынан баслаў ҳаққындағы усынысты алға қойған еди. Мектепте STEAM бағдарындағы пәнлер Cambridge International бағдарламасы тийкарында инглиз тилинде, жергиликли пәнлер Өзбекстан билимлендириў бағдарламасы тийкарында мәмлекетлик тилде алып барылады. Быйылғы оқыў жылын 24 оқыўшы питкерип атырған болса, олардың дерлик барлығы АҚШ, Уллы Британия, Қытай, Қырғызстан, Швейцария, Бирлескен Араб Әмирликлери, Венгрия, Австралия ҳәм басқа да мәмлекетлердиң абырайлы оқыў орынларына кириў бахтына миясар болды.
-2021-2022-оқыў жылы ушын 5-6-классларға жами 5381 оқыўшыдан арза келип түскен болса, соннан қабыллаў комиссиясы тәрепинен 5240 ҳүжжет қабыл етилди,-дейди Президент мектебиниң директоры Нурсулыў Балтабаева.- Соннан 5-классқа 2972, 6-классқа 2268 ҳүжжет тапсырылды. Жәми 1620 оқыўшыға мөлшерленген стадионда ашық далада математика пәнинен тест сынақларының дәслепки басқышы болып өтпекте. Тест процесслериниң ашық-айдынлығын тәмийинлеў мақсетинде ата-аналар ушын да барлық шараят жаратылған.
-Қызым Дияна Хожели районындағы 41-санлы мәмлекетлик қәнигелестирилген улыўма билим бериў мектебиниң 4-класын питкерип Президент мектебине тест тапсырып атыр,-дейди анасы Насиба Матниязова.-Биз ата-аналар тест процесин онлайн бақлап барыў имканиятына ийе болдық. Ким мектепте жақсы билим алған болса, тест сынақларына жақсы таярланған болса, әлбетте қабыл етиледи. Барлық оқыўшыларға сынақларда әўмет тилеймен.
Қәнигелердиң атап өткениндей, тест сынақлары еки күн даўам етеди. Ҳәр бир класстан 480 оқыўшыдан 960 оқыўшы келеси басқышқа жоллама алады. Екинши басқыш сынақлары 20 ҳәм 25-август күнлери аралығында болып өтеди. Соннан ең билимли 24 оқыўшы 5-классқа, 24 оқыўшы 6-классқа қабыл етиледи.
Қарақалпақстан хабар агентлиги