Нөкис гарнизонының Руўхыйлық ҳәм ағартыўшылық орайында Арқа-батыс әскерий округи сәркардаларының басшылығында «Сержантлар форумы» болып өтти.
Форумға округтиң басқарыў аппараты, әскерий хызметкерлер, бас сержант ҳәм бас сержант жәрдемшилери менен инструктор-сержантлар қатнасты.
Форумда тийкарынан Қорғаныў министрлиги қурамында енгизилген бас сержант ҳәм бас сержант жәрдемшилериниң жумысы, киши бөлимшелердеги сержантлардың жеке қурамы менен ислесиў, оларды басқарыў нәтийжелилиги, әскерий командаларда әскерий тәртип, әдеп-икрамлылық ҳәм руўхый жағдайын жақсылаў әскерий хызметкерлердиң таярлық дәрежесин арттырыў бойынша жумысларды жетилистириў, бас сержант ҳәм бас сержант жәрдемшилери менен инструктор-сержантлардың хызмет жумысын шөлкемлестириўде өз-ара тәжирийбе алмасыў сыяқлы мәселелер көрип шығылды.
Соны айтып өтиўимиз керек, Армиямызда бүгинги күни сержантлар корпусының дәрежеси ҳәм абырайы артып бармақта. Буған мысал ретинде, 2021-жылы жаўынгер бригада ҳәм батальонларда «инструктор-сержант» лаўазымының енгизилип, олардың әскерий дәрежелери «үлкен сержант» дәрежесине көтерилгенин, инструктор-сержант лаўазымына үш кәсипти жетик меңгерген, өз кәсибиниң шебери ҳәм экстремал шараятта бейимлесиў курсларын табыслы тамамлаған әскерий хызметкерлерди тайынлаў системасы жаратылғанын атап көрсетиў мүмкин. Қалаберди, Президентимиздиң арнаўлы пәрманына муўапық 2024-жылдан баслап армияда «бас сержант» ҳәм «бас сержант жәрдемшиси» лаўазымларының енгизилгенин, таңлап алынған ҳәм лаўазымға тайынланған сержантларға «сержант-майор», «мастер-сержант», «штаб-сержанты», «биринши-сержант» жаңа әскерий дәрежелердиң берилгени сержантлар корпусының армиядағы абырайын бир неше есеге арттырғанын айтып өтиўимиз керек.
Форум даўамында әскерий округ штаб сержантлары өзлериниң атқарып атырған ўазыйпалары бойынша шығып сөйлеп, әскерий округ күшлеринде бөлимшелердиң жаўынгерлик таярлық дәрежесин арттырыў, контракт бойынша әскерий хызметке жаңадан кирген жас кадрлардың әскерий билим ҳәм көнликпелерин тезирек ийелеўине жәрдемлесиў, кәсиплик шеберлигин арттырыў бойынша тәжирийбелери менен ортақласты.
Сондай-ақ, форумда қураллы күшлерде жаўынгерлик таярлықты раўажландырыў реформалары, бас сержант ҳәм бас сержант жәрдемшилери менен инструктор-сержантлардың бөлимшелер таярлығындағы орны ҳәм роли, психологиялық турақлылықты тәмийинлеўде жаўынгер тренинг ҳәм психологиялық шынығыўлардың орны, оқыў шынығыўларына таярлық көриў ҳәм өткериў тийкарлары, бөлимшелерде саламат руўхый-әдеп-икрамлылық орталықты жаратыў, әскерий хызметкерлердиң ўатансүйиўшилик тәрбиясын арттырыў бойынша баянатлар тыңланды.
Илаж соңында қатнасыўшылар ушын заман талаплары тийкарында жаўынгерлик таярлық шынығыўларын шөлкемлестириў ҳәм өткериў бойынша көргизбели шынығыўлар өткерилди.
Арқа-батыс әскерий округи баспасөз хызмети
Қарақалпақстан хабар агентлиги