23-апрель күни Өзбекстан Республикасы Президенти Шавкат Мирзиёев елимиздеги дипломатиялық миссиясын жуўмақлап атырған Тәжикстан Республикасының Айрықша ҳәм толық ҳуқықлы елшиси Содиқ Имомийди қабыллады.
Мәмлекетимиз басшысы Өзбекстан ҳәм Тәжикстан арасындағы дослық, жақсы қоңсышылық ҳәм стратегиялық шериклик қатнасықларында бүгинги күнде еки дос мәмлекет жетекшилериниң сиясий ерк-ықрары ҳәм исенимли ҳәрекетлери себепли жоқары дәрежеге ерисилгенин айрықша атап өтти.
Бүгинги күнде еки тәреплеме бирге ислесиў барлық бағдарларды қамтып алған ҳәм жедел раўажланыўда даўам етпекте, анық мазмун менен байымақта.
Жақын айларда Тәжикстанға жоқары дәрежедеги сапар режелестирилген болып, бүгин еки мәмлекет ҳүкиметлери узақ мүддетли келешекке мөлшерленген кең көлемли бирге ислесиўдиң жаңа күн тәртибин қәлиплестириў үстинде ҳәр тәреплеме ислемекте.
Мәмлекетимиз басшысы еки тәреплеме қатнасықлардың бүгинги жоқары дәрежесине ерисиўдеги үлкен хызметлери ҳәм көп қырлы бирге ислесиўди раўажландырыўға қосқан жеке үлеси ушын елши Содиқ Имомийди Өзбекстан Республикасының Ҳүрмет жарлығы менен сыйлықлады.
Дипломат оның елимиздеги жумысы жоқары баҳаланғаны ҳәм ҳәр тәреплеме қоллап-қуўатланғаны ушын Өзбекстан Президентине терең миннетдаршылық билдирди.
Содиқ Имомий еллеримиз ҳәм халықларымыз арасындағы дослық қатнасықларды беккемлеў жолындағы мақсет ҳәм ўазыйпаларды сөзсиз әмелге асырыўға буннан былай да бар күш-ғайратын қаратуғынын атап өтти.
ӨзА