Ташкентте «Иннопром» халықаралық санаат көргизбеси шеңберинде бир қатар ушырасыў, бизнес-форум ҳәм илажлар болып өтпекте. Өзбекстан – Россия исбилерменлер кеңесиниң бесинши мәжилиси олардан бири болып есапланады.
Еки тәрептиң исбилермен ўәкиллери қатнасқан илажда Өзбекстан Саўда-санаат палатасының баслығы, Өзбекстан тәрепинен Өзбекстан – Россия исбилерменлер кеңесиниң жәрдемши баслығы Адҳам Икромов, Россия Федерациясы Саўда-санаат палатасының вице-президенти Дмитрий Курочкин, Россия Федерациясы исбилерменлер кеңесиниң баслығы, Қубла Урал саўда-санаат палатасы президенти Федор Дегтярев ҳәм басқалар еки мәмлекет арасындағы саўда-экономикалық байланыслар беккемленип атырғанын айрықша атап өтти.
Бул илаж да еки мәмлекет исбилерменлер топарлары ушын кең ҳәм қолайлы имканият жаратып, келешекте жақсы нәтийжелерге ерисиўде айрықша әҳмийетке ийе.
Кеңес мәжилисинде тийкарғы итибар еки мәмлекет арасында саўда-экономикалық, инвестициялық байланысларды буннан былай да раўажландырыў ҳәм исбилерменлер арасында бирге ислесиў байланысларын беккемлеў мақсетинде ашық сөйлесиў платформаларын шөлкемлестириўге қаратылды. Сол себепли, мәмлекет исбилерменлери тараўлар бойынша ерискен жетискенликлери ҳәм келешектеги режелери менен бөлисти, ҳәр қыйлы тараўларда жумыс алып барып атырған исбилерменлер өз өнимлери ҳәм хызметлерин бирге ислесиў тилегинде болған исбилерменлерге көрсетип, бирге ислесиўдиң абзаллықлары және тийкарғы бағдарлары бойынша пикир алысты.
– Кәрханамыз 2018-жылы шөлкемлестирилген, – деди Намангандағы «Мексал» Өзбекстан – Россия қоспа кәрханасының басшысы Одилжон Отабоев. – 36 жумысшы-хызметкер мийнет етип атырған кәрханамызда металлды қайта ислеў ҳәм полат трубалар ислеп шығарылмақта. Россия тәрепинен 150 мың доллар муғдарында инвестиция киргизилген ҳәм жаңадан технологиялар алып келинген. Ҳәзирги күнде өнимлеримиз тек ғана ишки базарға бағдарланбақта. «Иннопром» халықаралық санаат көргизбеси тек ғана бизлерге емес, ал басқа жергиликли кәрханаларға да кеңнен имканиятлар есигин ашады.
Аўыл хожалығы, қурылыс, туризм, логистика, хызмет көрсетиў ҳәм текстиль бағдарларында жумыс алып барып атырған исбилерменлер арасында қызғын сөйлесиўлер өткерилип, бирге ислесиў бойынша бир қатар келисимлерге қол қойылды.
– Биз Өзбекстанда өтип атырған халықаралық көргизбеде «USM» холдинг топары қурамындағы «ИКС Холдинг», «МегаФон» ҳәм «Металлоинвест» компанияларының заманагөй инновациялық технологияларын көрсетпектемиз, – деди «ИКС Холдинг» компаниясының вице-президенти Станислав Киселев. – Бул мағлыўматларды сақлаў системаларының сервер үскенелеринен баслап, комплексли шешимлер менен жуўмақланған ең заманагөй перспективалы технологиялар болып есапланады. Көргизбе барлық қатнасыўшылар ушын нәтийжели болады, – деп ойлайман.
Атап өтилгениндей, ашық сөйлесиўлер перспективалы жойбарлар ҳәм келисимлерди ислеп шығыўды өз ишине алған өз-ара пайдалы бағдарларды анықлаў және Өзбекстан ҳәм Россия исбилермен топарлары арасындағы өз-ара бирге ислесиўдиң нәтийжели форматын жаратыўға имканият берди.
Илаж шеңберинде Россия – Өзбекстан исбилерменлер кеңеси ҳәм Өзбекстан – Россия исбилерменлер кеңеси арасында 2021-жылға мөлшерленген бирге ислесиў ҳаққындағы меморандумды әмелге асырыў бойынша Ҳәрекетлер режесине қол қойылды.
Насиба ЗИЁДУЛЛАЕВА,
ӨзАның хабаршысы