ӨзЛиДеП Қанлыкөл районлық Кеңеси тәрепинен жасларды кәсипке, исбилерменликке бағдарлаў мақсетинде «Исбилерменлер ҳәм жаслар» ушырасыўы шөлкемлестирилди.
Ушырасыўда жас исбилермен Кәмилжан Джуманиязов «Табысқа ерисиў сырлары» темасында жасларға семинар өтти. Ол өзиниң исбилерменлик жумысын қалай баслағаны, исбилерменликтиң өзине тән сырлары, көбирек нелерге итибар қатарыў кереклиги, бизнес жойбар ҳәм кредит алыў түрлери бойынша жасларға түсиник берди.
Исбилермен К.Джуманиязов 2012-жылдан берли «Наўрызлы Истам» фермер хожалығын басқарып келмекте. Буннан басқа халыққа турмыслық хызмет көрсетиў, халықты жумыс пенен тәмийинлеў мақсетинде бир қанша исбилерменлик субъектлерин де басқарып келмекте. Ҳәзирги ўақытта 80 пуқараны жумыс пенен тәмийинлеген. Келешекте фермер хожалығына қараслы 50 орынлы мийманхана қурып, халықты жумыс пенен тәмийинлеўди режелестирмекте.
Ушырасыўда жаслар исбилерменнен өзлерин қызықтырған сораўлар бойынша жуўап алды.
Қарақалпақстан хабар агентлиги