Бүгин елимизде аўыл-хожалығы тараўында қызғын мийнет мапазы даўам етип атырғанлығы себепли халықтың азық-аўқатқа болған мүтәжлиги қанаатландырылмақта. Ҳәттеки, исбилермен дийқан-фермерлердиң мийнети нәтийжесинде артығы экспортқа да шығарылмақта. Сондай-ақ, Өзбекстан аймағында жетистирилмейтуғын, халықтың талабы жоқары болған өнимлер импорты да даўам етпекте.
Қарақалпақстан Республикасы Өсимликлер карантини аймақлық инспекциясы Нөкис қаласы СЭЖ (сыртқы экономикалық жумыс) бажыхана постында карантин астындағы экспорт ҳәм импорт өнимлери, өсимликлер карантин тексериўинен өткерилмекте. Онда ҳәр бир карантин астындағы өним өсимликлер карантини тәртип-қағыйдаларына тийкарланып тексериўден өткериледи ҳәм тийисли рәсмий тәртип тийкарында тексерилип, таллаў жасалады.
– Бул бажыхана посты арқалы усы жылдың май айының 1-5 күнлери Қазақстан Республикасына өзимизде жетистирилген 19 тоннаға шамалас помидор, 73 тоннадан аcлам пияз, 9 тоннаға шамалас гешир, 21,7 тонна қуўырылған тары, 20 тонна жипек сабақлары өнимлери карантин тексериўинен өткерилип, фитосанитариялық сертификатлар рәсмийлестирилди,-дейди Нөкис қаласы СЭЖ бажыхана посты агроном-инспекторы Теңел Кайпов. – Сондай-ақ, усы жылдың апрель айы басынан мәмлекетимизге «Ўздавкарантин» инспекциясы тәрепинен берилген импорт карантин рухсатнамасына тийкарланып 254 тоннаға шамалас айғабағар майы, 200 тоннадан аслам қумшекер өнимлери Россия Федерациясынан импорт етилди ҳәм жүклер өз ўақтында тексериўден өткерилгеннен кейин рухсатнамалар берилди.
«Өсимликлер карантини ҳаққында»ғы Өзбекстан Республикасы Нызамына муўапық, экспортқа шығарылып атырған ҳәм республикаға алып келинип атырған, карантиндеги зыянкеслер, өсимлик кеселликлери ҳәм жабайы шөплерди алып өтиўи мүмкин болған туқымлар, өсимлик ҳәм өсимлик өнимлери ҳәм басқа да материаллар өсимликлер карантини агроном-инспекторлары тәрепинен тексериўден өткерилиўи мәмлекетимиздиң фитосанитариялық қәўипсизлигин тәмийинлеўге хызмет етеди. Себеби, сапалы аўыл-хожалық өнимлери зыянлы организмлерден таза орталықта жетистириледи.
Қарақалпақстан хабар агентлиги.