КҮННИҢ ЖАҢАЛЫҒЫ
Усы жыл 29-апрель күни Қарақалпақстан Республикасы жуқпалы кеселликлер емлеўханасында коронавирус инфекциясынан 12 пуқара толық саўалып шықты.
Емлеўханада коронавирус инфекциясынан толық емленип шыққанлар бүгинги күнге 62 пуқараға жетти. Қарақалпақстан Республикасы Денсаўлықты сақлаў министрлиги қәнигелердиң атап өткениндей, олардан 7 пуқара Нөкис қаласынан, 3 пуқара Қоңырат, 1 пуқара Мойнақ ҳәм 1 пуқара Қанлыкөл районларынан болып, олардың барлығы коронавирусқа шалынғанлар менен сөйлесиў арқалы жуқтырған. Наўқаслар толық саўалып, медицина хызметкерлериниң бақлаўында реабилитацияға жиберилди.
-Бул жуқпалы кеселликлер емлеўханасы шыпакерлери, мийирбийкелери ҳәм санитар хызметкерлериниң күни-түни тынымсыз мийнетиниң нәтийжеси,- дейди емленип шыққан қоңыратлы пуқара.-Буның ушын Президентимизге шексиз миннетдаршылық билдиремиз. Бул жерде барлық шараятлар жаратылған болып, емлеў жумыслары өз ўақтында әмелге асырылды. Қалған наўқаслардың да тезирек саўалып, мүбәрек Рамазан айында шаңарақларына қайтыўына тилеклеспен.
Қарақалпақстан Республикасы жуқпалы кеселликлер емлеўханасынан бундай хош хабарлардың келиўи даўам етпекте.
Д.АБИБУЛЛАЕВ,
Қарақалпақстан хабар агентлигиниң шолыўшысы.
М.ҲӘБИЙБУЛЛАЕВ тың түсирген сүўретлери.