Қаршы қаласында Өзбекстан Республикасы Спорт министрлиги ҳәм Өзбекстан гандбол федерациясы тәрепинен 16 жасқа шекемги (U-16) қызлар ҳәм балалар командалары арасында гандбол бойынша Өзбекстан кубоги болып өтти.
Бир ҳәпте даўам еткен жарыс соңында ер балалар арасында қарақалпақстанлы жас спортшылар финалға шекем барлық қарсыласларын жеңип шығып, кубок ушын болып өткен шешиўши ойында сурхандәрьялы гандболшыларға жеңилип қалды.
Ал, қызлар арасында өткерилген беллесиўлерде болса, қашқадәрьялы қызлар Өзбекстан кубоги ийесине айланды.
Гүмис медаль болса, Жиззақ, қола медалы Самарқанд ўәлаяты жасларына несип етти.
Жарыс соңында жеңимпаз командалар, ең жақсы ойыншы ҳәм төрешилер шөлкемлестириўшилер тәрепинен мүнәсип түрде сыйлықланды.
Адилбай Оразов,
Қарақалпақстан хабар агентлиги шолыўшысы.