Нөкис қаласындағы Rivoj Yulduz жуўапкершилиги шекленген жәмийетинде жана жыл алдынан бир қатар исбилерменлик субъектлериниң ўәкиллери, исбилерменликке қызығыўшы жаслар, пайтахтымыз турғынларының қатнасыўында «Жаңа жыл раклама карнавалы» атамасында байрам илажы шөлкемлестирилди.
Rivoj Yulduz реклама агентлиги сыртқы ҳәм ишки реклама, полиграфиялық ҳәм бизнес-сувенир өнимлерин ислеп шығарыў, сыртқы реклама объектлерин реклама мақсетинде ижараға бериў менен шуғылланады.
Илажда Өзбекстан Саўда-санаат палатасы Қарақалпақстан Республикасы басқармасы баслығының орынбасары М.Қосназаров ҳәм басқалар шығып сөйлеп, жыйналғанларды жақынласып қалған Жаңа жыл байрамы менен қызғын қутлықлап, жақсы тилеклерин билдирди.
– Компаниямыз 2008-жылы шөлкемлестирилген болып, бир принтер ҳәм бир компьютер менен өз жумысымды баслаған едим. Ҳәзирги ўақытта агентлигимизде 24 жас жумыс пенен тәмийинленген болып, Нөкис қаласына ҳәм республикамыздың барлық районларына хызмет көрсетип атырмыз. 1600 ден аслам клиентке ийемиз,-дейди Rivoj Yulduz ЖШЖ баслығы З.Кәримбаев.
Байрам кешесинде мастер-класслар, күтилмеген викториналар, исбилерменлер арасында пикир алысыўлар, концерт бағдарламалары шөлкемлестирилип, мийманлар Rivoj Yulduz жуўапкершилиги шекленген жәмийети тәрепинен таярланған шегирмелер ҳәм байрам саўғалары менен сыйлықланды.
Ә.Жийемуратов,
Қарақалпақстан хабар агентлиги.