И.Юсупов атындағы дөретиўшилик мектебинде И.Юсупов избасарларының дөретпелеринен ибарат «Аязий бағынан гүлдәсте» атамасындағы китаптың презентациясы болып өтти.
Илажда Руўхыйлық ҳәм ағартыўшылық орайы Нөкис қалалық бөлиминиң баслығы Қ.Нуратдинов, «Билим» баспасының бас редакторы З.Өсербаева ҳәм басқалар шығып сөйлеп, китаптың баспаға таярланыў, басылып шығыў процеси ҳаққында сөз етти. Китап бойынша өзлериниң пикирлерин билдирип, жас шайырлардың келешектеги дөретиўшилик жумысларына табыслар тиледи. Китапты шығарыў басламасын көтерип шыққан мектеп жәмәәтине миннетдаршылықларын билдирди.
Илажда сөзге шыққанлардың атап өткениндей, китапқа дөретиўшилик мектеби оқыўшыларының 50 ден аслам сайланды қосықлары киргизилген. Қосықларда ана Ўатанның гөззаллығы, устаз меҳири, балалар дүньясы рәңбәрең усылларда тәсирли сәўлеленген.
– Китапта мениң «Қарақалпақ қызыман», «Ана тилим» сыяқлы қосықларым орын алған, -дейди мектептиң 8-класс оқыўшысы Д.Жолдасбаева.- Досларымның да Ўатан, ана, устаз темаларындағы көплеген қосықлары усы китапта жарық көрди. Олар менен бүгинги кешеде мийманларға жаңа қосықларымыздан үзиндилер оқып бердик.
Китаптың жуўаплы редакторы дөретиўшилик мектеби директорының орынбасары, Қарақалпақстан халық билимлендириў ағласы З.Сәтбаева. Китапқа Қарақалпақстан халық жазыўшысы, Өзбекстан ҳәм Қарақалпақстан Жазыўшылар аўқамларының ағзасы, Бердақ атындағы мәмлекетлик сыйлықтың лауреаты М.Нызанов тәрепинен алғы сөз жазылған.
Китап презентациясы мушайра кешесине айланып кетти.
Қарақалпақстан хабар агентлиги