Жас әўладты Ўатан сүйиўшилик руўхында тәрбиялаў, әсиресе, жаслар арасында әдебиятты үгит-нәсиятлаў, китапқумарлықты раўажландырыў, быйыл юбилей жасы белгиленетуғын жазыўшы-шайырлардың өмир жолы, дөретиўшилиги менен кеңнен таныстырыў мақсетинде , Ақмаңғыт посёлкасындағы «Руўхый-ағартыўшылық сарайы»нда «Китап бизиң достымыз! » республикалық таңлаўдың Нөкис районлық басқышы болып өтти.
Таңлаўда Республикалық руўхыйлық ҳәм ағартыўшылық орайы районлық бөлиминиң баслығы Н.Тоимбетов шығып сөйлеп, қатнасыўшыларға әўмет тиледи.
Таңлаў тәжирийбели төрешилер қурамы тәрепинен бақлап барылды.
Таңлаў жуўмағында 1-орынды Нөкис районлық Халық билимлендириў бөлимине қараслы 20-санлы улыўма орта билим бериў мектебиниң оқыўшысы Айгерим Жубатқанова, 2-орынды 7-санлы улыўма орта билим бериў мектебиниң оқыўшысы Ҳүрлиман Пирниязова, 3-орынды 31-санлы улыўма орта билим бериў мектебиниң оқыўшысы Айнур Муратбаевалар ийеледи.
Таңлаў жуўмағында сыйлы орын ийелери ҳәм ҳәр қыйлы номинациялар бойынша жеңимпазлар анықланып, шөлкемлестириўшилер тәрепинен диплом ҳәм естелик саўғалар менен сыйлықланды.
Адилбай Оразов,
Қарақалпақстан хабар агентлигиниң шолыўшысы