Сөзиниң басында мәмлекетимиз басшысы өткен дәўир даўамында бул структура қәўипсизликти тәмийинлеў, Азияда өз-ара исеним ҳәм турақлы раўажланыўды беккемлеў мәселелери бойынша кең ҳәм ашық сөйлесиў ушын әҳмийетли сиясий майдан сыпатында өзиниң оғада зәрүр екенлигин көрсеткенин атап өтти. Өзбекстан форумды трансформациялаў мәселеси бойынша биргеликтеги жумысына қатнасыўға таяр екенин билдирди.
«Бүгин биз халықаралық қатнасықларда анықсызлық барған сайын өсип, сөйлесиў ҳәм исенимниң мисли көрилмеген дәрежеде жетиспей атырғанының гүўасы болмақтамыз.
Булардың бәри көп тәреплеме бирге ислесиў тийкарларына зыян тийгизбекте, урыслардың ҳәўиж алыўына себеп болып, глобал экономикада системалы үзилислерге алып келмекте.
Жүзеге келген геосиясий жағдай пүткил Азия континентиниң турақсызлығына кери тәсир етпекте.
Кризисли жағдайлар Орайлық Азия мәмлекетлерине де тиккелей тәсир етпекте, экономикалық интеграцияны тереңлестириў бойынша бизиң ҳәрекетлеримизди азайтпақта», деди Президент.
Қарақалпақстан хабар агентлиги