Түркияның Өзбекстандағы Айрықша ҳәм толық ҳуқықлы елшиси Мехмет Сурайё Эр еки күнлик сапар менен республикамызға келди.
Мийманды Қарақалпақстан Республикасы Жоқарғы Кеңесинде қабыллаў мәресими болды.
Илажда Қарақалпақстан Республикасы Жоқарғы Кеңесиниң Баслығы М.Ерниязов елшини елимизге сапары менен қутлықлап, Президентимиздиң басшылығында Арал апатшылығы ақыбетлерин сапластырыў, сырт ел инвестицияларын тартыў, олар менен бирге ислесиў бағдарында әмелге асырылып атырған илажларға тоқтап өтти.
Атап өтилгениндей, Түркия бүгинги күнде қурылыс, денсаўлықты сақлаў, аўыл хожалығы, билимлендириў ҳәм басқа да тараўларда жәҳәнде жетекши мәмлекетлерден бири есапланады. Сонлықтанда, «Нукус Сити» қурылысында, халықтың денсаўлығын сақлаў тараўында түркиялы қәнигелер менен бирге ислесиў мәселелери көрип шығылмақта. Өткен жылы «Өзбекстан-Түркия саламатлық ҳәптелиги» илажы шеңберинде түркиялы тәжирийбели шыпакерлер республикамызда болып, наўқасларды тереңлестирилген медициналық тексериўден өткерди ҳәм зәрүр болғанларына пластикалық, реконструктивлик ҳәм гинекологиялық операциялар иследи.
Өз гезегинде елши шын жүректен қабыл еткени ушын өзиниң терең миннетдаршылығын билдирди. Сапар етиў даўамындағы режелер, келешекте биргеликте әмелге асырылатуғын жойбарларға тоқтап өтти.
Қабыллаўда Түркияның бирге ислесиў ҳәм муўапықластырыў агентлигиниң (ТИКА) Өзбекстандағы ўәкилханасының координаторы Али Ихсан Чағлар елши менен бирге болды.
Сапар даўамында мийманлар Мойнақ районында, Бердақ атындағы Қарақалпақ мәмлекетлик университетинде, республикалық балалар көп тармақлы медицина орайында болып, жумыслар менен танысты. Ҳәзирги ўақытта Бердақ атындағы Қарақалпақ мәмлекетлик университети менен Түркияның жоқары оқыў орынлары арасында бирге ислесиў жақсы жолға қойылған. Атап айтқанда, Ататүрк университети менен Мевлана бағдарламасы тийкарында 2019-2020-оқыў жылында студентлер алмасыў бойынша бирге ислесиў меморандумы дүзилген. Буннан тысқары, Түркияның бирге ислесиў ҳәм муўапықластырыў агентлигиниң (ТИКА) қәнигелери тәрепинен республикамыздағы емлеў мәкемелери шыпакерлериниң қәнигелигин арттырыў мақсетинде төрт күн даўамында семинар өткерилди. Усы семинарға белсене қатнасқанларға сертификатлар тапсырылды.
Мийманлар сондай-ақ, И.В.Савицкий атындағы көркем өнер музейинде де болды.
Д.АБИБУЛЛАЕВ,
Қарақалпақстан хабар агентлигиниң шолыўшысы.
М.ҲӘБИЙБУЛЛАЕВ тың түсирген сүўретлери.