Сочи қаласындағы «Фишт» стадионында болып өткен Хорватия ҳәм Россия сайланды командалары футболшыларының ушырасыўы жәҳән чемпионаты ярым финалының соңғы қатнасыўшысын анықлап берди.

Ойын майдан ийелериниң избе-из ҳүжимлери менен басланды. Усындай ҳүжимлердиң биринде ойынның 31-минутында Черышев тәрепинен киргизилген әжайып гол россиялыларды есапта алдыға алып шықты. Ойынның 39-минутында Манджукич тәрепинен жеткерип берилген топты Крамарич басы менен дәрўазаға жоллап, есапты теңлестирди.

Екинши бөлимде есап өзгермеди. Белгиленген еки таймның 101 минутында Вида Акинфеевтин дәрўазасына екинши топты жоллады. Ойынның тамамланыўына санаўлы минутлар қалғанда Мариу Фернандес есапты теңлестирилди. Солай етип, қосымша ўақытта 2:2 есабында жуўмақланды.

Өткен ойында қарсыласлары үстинен пенальтилер сериясынан жеңиске ерискен еки команданың беллесиўинде әўмет хорватиялыларға күлип бақты. Олар 11 метрден топ тебиў бойынша 4:3 есабында жеңиске еристи.

Ойыннан кейин майдан ийелери командасының ҳүжимшиси Артём Дзюба көз жасларын жасыра алмады. Жәҳән чемпионаты ойынлары даўамында қоллап-қуўатлап турған бәрше жанкүйерлерге миннетдаршылық билдирди.

Солай етип, жәҳән чемпионатының ярым финалында Европаның Франция, Бельгия, Англия ҳәм Хорватия сайланды командалары ушырасатуғын болды.

Франция-Бельгия сайланды командаларының ушырасыўы 10-июль күни Санкт-Петербург қаласында болып өтсе,  Англия ҳәм Хорватия командалары 11-июль күни Мосвадағы «Лужники» стадионында майданға түседи.

Қарақалпақстан хабар агентлиги.