Ўзбекистон Transparency International халқаро ноҳукумат ташкилотининг Коррупцияни қабул қилиш индексининг 2020 йил учун эълон қилинган нашрида ўз ўрнини 7 поғона яхшилади.
Ўзбекистон 2012 йилда 17 балл билан 170-ўринни эгаллаган бўлса, 2020 йилга келиб 26 балл билан 146-ўринга кўтарилишга эришди.
Мазкур ижобий ўзгаришларнинг сабаби – сўнгги йилларда коррупцияга қарши курашнинг ҳам ҳуқуқий, ҳам институционал асослари мустаҳкамланаётганидир. Ушбу жиддий муаммо давлат ва жамият кун тартибида кенг муҳокама қилиниб, коррупцияга тоқатсизлик муҳити шаклланиб бораётир.
Адлия вазирлиги маълумотига кўра, коррупция иллатига қарши кураш масаласида давлат органларида тобора очиқлик кенг жорий этилмоқда.
Фуқароларни қийнаб келаётган муаммоларни муҳокама қилиш билан бирга уларнинг ечимини топишга бўлган ҳаракат сезиларли равишда кучайди. Бу каби чоралар Коррупцияни қабул қилиш индексининг туб моҳиятига мос келади.