Сенаторлар жамиятда бўлаётган воқеа-ҳодисалар, одамларни ташвишга солаётган ҳодисалар бўйича ўз вақтида муносабат билдириб бориши керак. Сенаторлар ялпи мажлис бўлишини кутиб ўтирмасдан, масъуллардан изоҳ талаб қилиши, натижасини оммавий ахборот воситалари, ижтимоий тармоқлар орқали маълум қилиб бориши мақсадга мувофиқ.Давлатимиз раҳбари бундан буён коррупцияга қарши курашиш бўйича қаттиқ кураш олиб борилишига алоҳида эътибор қаратди. Айниқса, олий таълим тизимини коррупциядан тозалаш долзарб. Зеро, энг катта коррупция бугунги кунда олий таълимда.
Бунга Иқтисодиёт университетида содир бўлган нохуш ҳолатларни эслаб ўтиш кифоя. Университетнинг собиқ ректори Б.Ҳодиев ушбу муассасани коррупция ботқоғига ботиргани аттестацияда яққол кўрсатди. Университетнинг 65 фоиз домласи билими бўлмагани боис синовдан ўта олмаган.
Олий таълимдан ташқари қурилиш соҳаси ҳам коррупциялашган. Ушбу соҳалар бўйича Сенатда прокурор ҳисоботини эшитиш мақсадга мувофиқ.
Яқинда Бош прокуратурада бўлиб ўтган мажлисда олий таълим вазири “биз хато қилдик, кечиринг”, деган сўзни айтган. Бироқ бундан буён кечирим билан иш битмайди, ҳар бир ҳолат бўйича қонуний баҳо берилади, деди Президент. – Ҳаммани шу пайтгача кечириб келдик. Энди кечирмаймиз, барча ишлар қонун билан амалга оширилади.
Ҳар бир сенатор коррупцияга қарши курашишни кун тартибига қўйиши керак. Зеро, давлатимиз раҳбари қайд этганидек, коррупция одамларнинг ғазабини келтираётган масаладир.