Халқларимизнинг азалий, адабий дўстлиги рамзига айланган бу каби тадбирлар маданий-маърифий мулоқотлар қамровининг янада кенгайиши ва мустаҳкамланишида, ижодкорларнинг ўзаро фикр ва тажриба алмашинувида муҳим аҳамият касб этади. Кўтаринки, байрамона ва юксак савияда ўтказилаётган маданият кунлари доирасида қардош халқ рассом ва ҳунармандлари ижодига, номдор адиб ва жамоат арбоби Чингиз Айтматов ижодига бағишлаган кўргазма бўлиб ўтмоқда.

Ўзбекистон Республикаси Маданият вазирлигида қирғизистонлик ҳамкасблар билан бирга келгусидаги ижодий режалар белгилаб олинди. Алишер Навоий номидаги Кино саройида қўшни давлат кинематографлари томонидан ишланган фильм мухлисларга тақдим этилди. Бу каби маданий тадбирлар қадим ва навқирон Самарқанд шаҳрида ҳам бўлиб ўтиши кўзда тутилган.

– Ижодий сафар кўтаринки руҳда ўтмоқда, – дейди Қирғизистон халқ артисти Саломат Содиқова. – Халқингизнинг маҳорати, истеъдоди, миришкорлиги таҳсинга лойиқ. Ўзбекистоннинг маданий-маънавий, илмий-ижодий мероси жаҳон миқёсида тан олинган ва юксак эътироф этилган. Юртингизда кечаётган шиддатли ўзгаришлар, ислоҳотларнинг шахдам одими ҳар қандай инсоннинг ҳавасини келтиради. Ҳар гал бу табаррук диёрга келиб буюк алломалар, Соҳибқирон Амир Темур мангу қўним топган зиёратгоҳларга борганимда руҳимда енгиллик, улкан маънавий қувват пайдо бўлади. Дўстлигимиз абадий бўлишини доим Яратгандан сўрайман.

– Маданият кунлари асносида ўзбек халқининг бой мероси билан ҳам танишишга муваффақ бўлдик, – дейди «Қамбарқан» ансамбли созандаси Қурманжон Акматова. – Тошкентдаги бир қатор зиёратгоҳлар, тарихий масканларга саёҳат қилдик. Музейларга бордик. Санъат соҳаси вакиллари билан ижодий мулоқотда бўлдик. Бундай тадбирлар тафаккуримизни янада бойитишда ғоят муҳимдир.

Концертда қирғиз санъат усталари репертуаридаги энг сара куй-қўшиқлар, рақслар ижро этилди.